आफू निकटका सांसदलाई ओलीले भने- जुनसुकै परिस्थिति आउन सक्छ, तयार बस्नू

किशोर दहाल
मंगलबार, वैशाख १६, २०७७, १३:३१

काठमाडौं- पार्टीमा विवाद गहिरिँदै जाँदा प्रधानमन्त्री समेत रहेका नेकपा अध्यक्ष केपी ओलीले आफू निकटका सांसदहरुलाई तयार अवस्थामा बस्न भनेका छन्। सोमबार दिनभर नेकपाका नेताहरुको बहुपक्षीय भेटवार्ता भएको थियो। प्रधानमन्त्री ओली र माधव नेपालका साथै उनीहरु निकटका नेताहरुको पनि छलफल भएको थियो। त्यस्तै अर्का अध्यक्ष प्रचण्ड र झलनाथ खनालबीच पनि भेटवार्ता भएको थियो। साँझपख भने प्रधानमन्त्रीले आफू निकट झन्डै दुई दर्जनभन्दा बढी सांसदहरुलाई भेटेर पछिल्लो घटनाक्रमको व्याख्या गर्दै आगामी रणनीतिका बारेमा केही संकेत गर्ने प्रयत्न गरे।

‘पार्टीमा संकट देखिएको कुरा तपाईंहरुलाई तपाईंहरुलाई थाहै छ। यसको कारण पनि तपाईंहरुलाई थाहै छ’, प्रधानमन्त्रीलाई उद्धृत गर्दै भेटघाटमा सहभागी एक सांसदले भने, ‘अब जुनसुकै परिस्थिति पनि आउनसक्छ। तयार बस्नुहोला।’

प्रधानमन्त्रीको संकेत पार्टी फुट्ने अवस्था पनि आउन सक्ने भएकाले त्यतिबेलाका लागि साथ खोजेको ती सांसदले अर्थ्याए।


पार्टीको अर्को पक्षले आफूलाई प्रधानमन्त्री तथा पार्टी अध्यक्षबाट हटाउने अन्तिम प्रयास गरिरहेको प्रधानमन्त्रीले सांसदहरुलाई सुनाएका थिए। ‘उहाँहरुले पहिल्यैदेखि प्रयास गरिरहनुभएको हो। तर, सफल हुनसक्नुभएको थिएन। यसपटक भने वारको पार नै गर्ने गरी अघि बढिरहनुभएको छ। उहाँहरु मलाई अपदस्थ गर्ने हिसाबले अघि बढिरहनुभएको छ’, ओलीले भनेका थिए।

उनले पार्टीमा संकट देखिएकाले यस्तै ढंगले अघि बढ्न नसकिने बताएका थिए।

प्रधानमन्त्रीले आफूले कुनै पदबाट पनि राजीनामा नदिने सांसदहरुलाई प्रष्ट पारेका थिए। ‘म कुनै पदबाट पनि राजीनामा दिन्नँ। उहाँहरुका सबै षडयन्त्रका विरुद्ध लड्न तयार छु। सक्षम छु’, प्रधानमन्त्रीले भनेका कुरा ती सांसदले दोहोर्‍याए।

आफूलाई पहिल्यैदेखि घेराबन्दी गरिएको ओलीले दुखेसो गरेका थिए।

हिजो दिउँसो ओली र नेपाल पक्षका नेताहरुबीच कोटेश्वरको एक घरमा लामो छलफल भएको थियो। त्यहाँ माधव नेपाल पक्षले ओलीले प्रधानमन्त्री र पार्टी अध्यक्षबाट राजीनामा दिनुपर्ने बताएका थिए। त्यसैलाई संकेत गर्दै प्रधानमन्त्रीले आफू पछि नहट्ने बताएका थिए। पछि हट्ने आफ्नो स्वभाव नभएको उनले प्रष्ट पारेका थिए।

उनले यतिबेला सरकार परिवर्तनको प्रयास गर्नु भनेको अस्थिरता निम्त्याउनु मात्रै भएको बताएका थिए। उनले अस्थिरता चाहनेहरुको प्रतिवाद गर्न आग्रह गरेका थिए।

प्रधानमन्त्रीले पार्टी एकता गर्दाको सहमति साथीहरुले भुल्न खोजेको बताए। ‘सहमति गर्ने प्रचण्ड आफैं पनि लाग्नुभएको छ’, ओलीले भनेका थिए, ‘जबकि पार्टीमा अहिले दुईमध्ये एक अध्यक्षले असहमति राख्ने बित्तिकै निर्णय हुँदैन।’

अध्यादेशमा विरोध भएपछि त्यसलाई फिर्ता लिएको र त्यसपछि विवाद साम्य हुने अपेक्षा आफ्नो रहेको प्रधानमन्त्रीले भनेका थिए।

पार्टीमा अहिले स्थायी समितिको बैठक माग्नेहरुप्रति ओलीले आक्रोश पोखेका थिए। कोरोनाका कारण अहिले बैठक बस्नु उचित नहुने कुरालाई पूर्व माओवादीका नेताहरु र माधव नेपाल पक्षका नेताहरुले गलत अर्थ लगाएको उनले बताएका थिए। ‘अहिले कोरोनाको महामारी छ। सबै एकैठाउँमा बसेर बहस गर्ने अवस्था छैन’, ओलीले भनेका थिए, ‘उहाँहरु केके न बित्नेजस्तो गरी बैठक मागिरहनुभएको छ।’

बैठकमा नवराज सिलवाल, सरिता न्यौपाने, तिलक महत लगायतले बोलेका थिए। उनीहरुले ओलीको प्रशंसा गरेका थिए। निर्वाचनमा ओलीको नामकै कारण जित सम्भव भएको बताएका थिए। जनतामा ओलीप्रति अझै भरोसा भएको उनीहरुको कथन थियो। उनीहरुले प्रधानमन्त्रीलाई पछि नहट्न आग्रह गर्दै आफूहरुको साथ रहेको बताएका थिए।

नेपाल लाइभमा प्रकाशित / https://nepallive.com/story/215514