बिप्पाको कपिराइट अन्त्यको घोषणा गर्छु : बाबुराम भट्टराई

आज ०७५ जेठ आज १० मा संसदमा आफ्नो धारणा राखेका डा बाबुराम भट्टराईको भाषणको एक अंश:

भारत र चीन उदाउँदो अर्थतन्त्रको रुपमा आउँदैछन्। त्यसैले तिनीहरुसँग नजोडिइकन हामीले विकास गर्छौं भनेर सम्भव हुँदैन। त्यसैले हामीले यी दुईसँग सन्तुलन कसरी मिलाउने हो, भूराजनीतिक सन्तुलन, त्यस्तै बाह्य पूँजीलाई पनि पनि राष्ट्रिय हित अनुकूल ल्याएर अघि बढ्नको निम्ति हामीले उपयुक्त नीति ल्याउनुपर्छ। यहाँ संकेत त छन्, तर भन्न हिचकिचाहट भएजस्तो म देख्छु। मैले पहिले पनि भनेको छु, बाह्य पूँजीको संरक्षण नगरीकन, त्यसलाई स्वागत नगरिकन, हाम्रो राष्ट्रिय हित अनुकूल हुनेगरी दुवै देश (भारत र चीन)बाट पूँजी ल्याएर, लगानी गरेर वस्तु निर्यात नगरेसम्म देशको विकास हुँदैन। बाह्य पूँजीका निम्ति सुरक्षा र संरक्षण दिने नीति हाम्रो हुनै पर्छ। त्यसका लागि हामीले बिप्पा सम्झौता गर्नैपर्छ। तर बिप्पा शब्दले किन संकोच पैदा गरिरहेको छ, मैले बुझेको छैन। यदि यो बाबुराम भट्टराईले प्रधानमन्त्री कालमै उठाएको हो भन्ने लागेको हो भने त्यसप्रति मेरो कुनै कपीराइट छैन। मैले यही मञ्चबाट त्यो कपिराइट अन्त्य गरेको घोषणा गर्छु।